कबिता

सन्दर्भ जनगणना जनसंख्या सरकारले खटाएका प्रत्येक ठाउँमा पुगें प्रत्येक सहर, प्रत्येक गाउँमा पुगें र अंकहरु बटुलें ! आधा थिए वृद्धहरुका शरीर तर पूरै लेखिदिएँ ! नाङगा थिए बालबालिकाहरूका हर तर सिङगै लेखिदिएँ ! अपांगहरुका आँखा हेरिन, कान खोजिन खुट्टा र हात कता राखेका छौ केही पनि सोधिन, सग्लै लेखिदिएँ ! आधा मरेका बलात्कृतहरु गोडा मुनि परेका शोषित उत्पीडितहरु समाजको ऐनामा कैलै नदेखिएका अनुहारहरु देशको नक्शामा कैलै नभेटिएका पदचापहरु सबलाई खोजें, भेट्टाएँ र योगफल निकालें !! मेरो देशले जनसंख्या पायो मैले मेडल पाएँ, प्रमाणपत्र पाएँ लेखिएको थियो- उत्कृष्ट कार्यसम्पादन तथा मूल्यांकनको आधारमा प्रदान गरिएको..! सम्मानको बोझले थिचिएर हो वा कुनै विस्मृत दुर्घटनाले किचिएर पाइलाहरु गह्रौं भइरहे बाटोभरी ! घर आएर घोत्लिइरहें कहाँ बिग्रियो हिसाब ? किन आयो जनशंख्या कम ? मधुरो आवाजमा जहान बोलिन ए हजुर, ती फालेका चार छोरीहरुलाई जोड्न छुटाउनुभयो कि .....?!